ଚତୁର୍ଥ ଟେଷ୍ଟରେ ଇଂଲଣ୍ଡକୁ ଗୋଟିଏ ଇନିଂସ ଏବଂ ୨୫ ରନରେ ପରାସ୍ତ କଲା ଭାରତ । ଏହା ସହ ସିରିଜକୁ ୩-୧ ରେ ଜିତିଛି ଭାରତ । ଏହି ମ୍ୟାଚ ବିଜୟ ସହ ଆଇସିସି ଟେଷ୍ଟ ଚାମ୍ପିଅନସିପ ଫାଇନାଲରେ ପହଂଚିଛି ଭାରତ । ଭାରତର ପ୍ରଥମ ଇନିଂସର ଅଗ୍ରଣୀ ୧୬୦ ରନକୁ ପିଛା କରି ଦ୍ବିତୀୟ ଇନିଂସରେ ମାତ୍ର ୧୩୫ ରନରେ ଅଲଆଉଟ ହୋଇ ଯାଇଥିଲା ଇଂଲଣ୍ଡ ଟିମ୍ । ଭାରତ ପକ୍ଷରୁ ଦୁଇ ସ୍ପିନର ରବି ଚନ୍ଦ୍ରନ ଅଶ୍ୱିନ ଏବଂ ଅକ୍ସର ପଟେଲ ୫ ଟି ଲେଖାଁଏ ୱିକେଟ ଅକ୍ତିଆର କରିବାରୁ ୩ ଦିନରେ ଶେଷ ହେଲା ଚତୁର୍ଥ ଟେଷ୍ଟ ।
ଭାରତ ପକ୍ଷରୁ ଏହି ମ୍ୟାଚରେ ଶତକ ହାସଲ କରିଥିବା ରିଷଭ ପନ୍ଥଙ୍କୁ ମ୍ୟାନ ଅଫ ଦି ମ୍ୟାଚ ବିବେଚିତ କରାଯାଇଛି । ସିରିଜରେ ସର୍ବାଧିକ ୱିକେଟ ହାସଲ କରିଥିବା ରବି ଅଶ୍ୱିନଙ୍କୁ ମ୍ୟାନ ଅଫ ସିରିଜ ବିବେଚିତ କରାଯାଇଛି ।
ଏହି ଟେଷ୍ଟ ବିଜୟ ସହିତ ଭାରତ ବିଶ୍ବ ଟେଷ୍ଟ ଚାମ୍ପିଅନସିପ୍ ପାଇଁ ଯୋଗ୍ୟତା ଅର୍ଜନ କରିଛି । ଜୁନ ୧୮ ରୁ ୨୨ ଯାଏ ଇଂଲଣ୍ଡର ଲର୍ଡସ କ୍ରିକେଟ ଗ୍ରାଉଣ୍ଡରେ ଭାରତ ଏବଂ ନ୍ୟୁଜଲାଣ୍ଡ ମଧ୍ୟରେ ଆଇସିସି ୱାର୍ଲଡ ଟେଷ୍ଟ ଚାମ୍ପିଅନସିପ୍ ଖେଳାଯିବ ।
